تعال بسرعه وشوف احلى القصايد السودانيه

السلام عليكم ...
الليله جايب ليكم قصيده كنت قريتها في كتاب وعجبتني
وحبيت اوريكم ليها وانشاء الله تعبحبكم :-

بحب بالجد
ومن غير حد

أحب بالجملة والتقسيط

أحب بالدور بدون تفنفيط

أحب من كسلا لي مليط

أحب من حلفا لي توريت

أحب من دون عذر واسباب

وازيد كل ثانية في الاحباب

أحب الجامعة والطلاب

أحب الثانوي والكُتاب

أحب الوالي والارباب

وأموت في كورة الشراب

بحب أنا مية في المية

كل تنهيدة سودانية

حتى الفول مع الطعمية

هم العملو لي شخصية

بهذا اعلن الحب الكبير

بدون فترة انتقالية

محبة اكيدة دايمة كمان

محبة وطاقة ازلية

وادعوكم جميعاً للمحبة

بصورة رسمية

بدون قانون.. وأي ظنون

وافكار فارغة زي دي

متين يكبر معانا الحب ..؟

ويصبح حاجة عادية ..؟

متين نعرف نحب الناس

ونمسح ماضي الاسية ..؟

متين نعرف نعيش الحب

بدون ادنى انتهازية..؟

متين ح تشيلني في عيونك

واشيلك جوه عينيَّ..؟